ဒီစီသွား တောလား - ၅

၂၀၂၄ မတ် ၂၅ တနင်္ဂနွေနေ့ နေ့လည်ဖက် ကျောက်တိုင်ဘေးနား World War II Memorial ကိုဖြတ်ကျော်ပြီး Lincoln Memorial ဆီလမ်းလျှောက်ကြတယ်။ တနင်္ဂနွေနေ့ လည်းဖြစ် ရာသီဥတုကလည်း သာယာတော့ လူတွေအများကြီးပဲ။ ဒီစီလာဖူးသမျှ ဒီတခါလူအများဆုံးပဲ။ World War II Memorial ကတော့ ဆူနမ်အကြိုက်ဆုံးနေရာ။ World War II Memorial ကို အဖေက မှတ်မိတယ် တိုးကားက ဟိုးနားမှာရပ်ထားတာတဲ့။ Korean War Veterans Memorial မှာ ထိုင်နားပြီး အမောဖြေကြတယ်။ Martin Luther King Jr. Memorial နားကနေဖြတ်ပြီး Tidal Basin တလျှောက်လမ်းလျှောက်တယ်။ အဝေးက Jefferson Memorial ကိုမြင်ရတယ်။ နာမည်ကြီးတဲ့ Stumpy ချယ်ရီပင်ဆီထိ သွားကြည့်ချင်ပေမဲ့ အဖေတို့က လမ်းမလျှောက်နိုင်တော့ဘူး။ အသစ်ဆောက်လုပ်မဲ့ ရေထိန်းဘောင်ကြောင့် Stumpy ချယ်ရီပင်ကို နေရာရွှေ့တော့မှာမို့ အဲ့ဒီချယ်ရီနာမည်ကြီးနေတယ်။ သက်တမ်းကြာပြီမို့လို့ ခုတ်ပစ်တော့မယ် ချယ်ရီတွေကို ဂျပန်သံရုံးက လာနှုတ်ဆက်တယ်။ ချယ်ရီတွေပေးလို့ ဂျပန်ကို ကျေးဇူးတင်သလို ဂျပန်တွေကလည်း ချယ်ရီတွေကို ဂရုတစိုက်စောင့်ရှောက်ပေးလို့ National Park Service ကို ကျေးဇူးတင်တယ်။ gratitude ကို မြင်ရတာ ကြည်နူးစရာ။ မြန်မာနိုင်ငံမှာလည် ပိတောက်ပန်းတွေပွင့်တဲ့အခါ မခူးကြမချိုးကြဘဲ ချယ်ရီပန်းတွေလိုပဲ အလှကြည့်ကြရင် သိပ်ကောင်းမှာပဲ။

Happy Traveling!

စန်းထွန်း

ဧပြီ ၂၄၊ ၂၀၂၄။

ဒီစီသွား တောလား - ၄

၂၄ မတ် ၂၀၂၄ တနင်္ဂနွေနေ့ မနေ့က မိုးတနေကုန်ရွာထားတော့ ကောင်းကင်က တိမ်ကင်းစင်ကာ ကြည်လင်ပြာလဲ့နေတယ်။ နေရောင်ခြည်လင်းလက်ပြီး သြကာသတခုလုံး သာယာလှပနေတယ်။ အိမ်ဖြူတော်နဲ့ တလမ်းပဲခြားတော့ ဒီနေ့နေသာလှတယ်ဆိုပြီး ဓာတ်ပုံသွားရိုက်တယ်။ ဆယ်ကျော်သက်အရွယ် သမီးနှစ်ယောက်နဲ့အမေက ကိုယ်တို့ကို ဓာတ်ပုံရိုက်ပေးရမလား မေးလာပြီးရိုက်ပေးတယ်။ ချယ်ရီပန်းနားမှာ ဓာတ်ပုံရိုက်နေတော့လည်း သူတို့ဖြတ်သွားတာနဲ့ကြုံလို့ ဓာတ်ပုံရိုက်ပေးသွားတယ်။ ပြီးတော့ ကားပေါ်ကနေ လက်ပြသွားသေးတယ်။ အမေရိကန်တွေက အဲ့ဒီလိုဖော်ရွေတယ်။ ဘိလပ်သွားတုန်းက ဘိလပ်သားတွေက စကားလာမပြောကြဘူး။ ဥရောပသားတွေက အဲ့လိုပဲတဲ့။ မနက် ၉ နာရီလောက် မြေအောက်ရထားစီးပြီး ၁၀ မိနစ်အကြာ Capitol South ဘူတာမှာဆင်းတယ်။ ဒီစီရထားတွေက သန့်ရှင်းနေတာပဲ နယူးယောက်က ရထားတွေနဲ့ တခြားစီ။ အဖေတို့က ဒီစီရထား ပထမဆုံးစီးဖူးတာဆိုတော့ အမှတ်တရဓာတ်ပုံရိုက်ပေးတယ်။ Library of Congress ကပိတ်တယ် Capitol tour ကဖွင့်ပေမဲ့ ၂၀၁၇ က ရောက်ဖူးတယ်။ အဖေတို့ကို မေးကြည့်တော့ မှတ်မိကြတယ်။ နေပူနေပေမဲ့ အေးလိုက်တာ ဆောင်းတွင်းကျနေတာပဲ။ ကယ်ပီတယ်နားမှာ ချယ်ရီပန်းတွေ ပွင့်နေတာ သိပ်လှတာပဲ။ ဒီနေရာက သမ္မတတွေ ကျမ်းသစ္စာကြိမ်ဆိုတဲ့နေရာ၊ ကျောက်တိုင်၊ ပြတိုက်တွေနဲ့ National Mall ကိုတမျှော်တခေါ်ကြီး မြင်ရတယ်။ ကိုယ်အရင်ရုံးက ကယ်ပီတယ်နားမှာ သောကြာနေ့ညနေဆိုရင် ကယ်ပီမောလ်တလျှောက် လမ်းလျှောက်ပြီးမှ အိမ်ပြန်တယ်။ ပိတ်ရက်ဆို ဒီစီကိုလာ ပြတိုက်မှာ တနေကုန်လည်။ တကိုယ်ရေ လွှင့်မျောခြင်းနေ့ရက်များ။ နေ့လည် ၁၂ နာရီလောက် ရထားစီးပြီး ဟိုတယ်ပြန် နေ့လည်စား။ ညနေစောင်း Tidal Basin ဖက်မှာ ချယ်ရီပန်းသွားကြည့်တဲ့ အကြောင်းကတော့ နောက်ပို့စ်မှပဲ တင်ပါတော့မယ်။

Happy Traveling!

စန်းထွန်း

ဧပြီ ၂၀၊ ၂၀၂၄။

ဒီစီသွား တောလား - ၃

၂၀၂၄ မတ် ၂၃ စနေနေ့ National Gallery of Art ပြတိုက်က ပန်းချီကားလေးတွေပါ။

စန်းထွန်း

ဧပြီ ၁၇၊ ၂၀၂၄။